देश र बुद्ध

जहाँ प्रश्नपत्र किनेर

तक्मा भिर्छ धनाढ्य विधार्थी

र, गरीब छात्रले च्याँत्ने गर्छ

आफ्नो इमानको सर्टिफिकेट ,

जहाँ अजङ्गको पहाड जस्तो जिन्दगी

र, आँधिहुरीको गीत झैं जीवन ठानेर

बसन्तपुरको दरबारबाट हामफाल्छे

पिठ्यूँको बालक सँगै आमा ,

जहाँ सधैं नयाँ हत्याको खोजमा हुन्छन् -

राजनीतिक शरण पाएका गुण्डाहरु ,

जहाँ सम्पूर्ण मोह र लोभहरु त्यागेर

प्रजाको भोक् ,रोग र शोकको कारण खोज्न

दरबारबाट निस्केको बुद्ध -

लाचार फर्कन्छ हाम्रो दैलोमा

जहाँ घर घरमा बनिसके बारुद कारखाना,

जहाँ आफ्नो मिर्गौला बेचेर तिर्नुपर्छ

हर छोराहरुले बाबुको रक्सी र जुवाको ऋण ।